O klask ur skoazeller·ez melestradur ha stummañ emaomp !

---

🧭 Ho kefridi

Sikour da verañ melestradurezh ar stummadurioù, doujañ da reolennoù ar stummañ, aozañ  hag heuliañ mont-en-dro ar prantadoù stummañ evit harpañ penn ar bedagogiezh pe kenurzhier·ez ar stummadur ha gwarantiñ :

• mont-en-dro plaen pep kursus,
• ma vo kaset ar stummadurioù da benn diouzh reolennoù an arc’hantaouerien (CPF, Rannvro, France Travail, OPCO…),
• ma vo doujet da reolennaoueg-dave Qualiopi,
• kalite ar stummadurioù dre vras.

Ar post a sell ouzh an holl stummadurioù ha kentelioù kinniget gant Skol an Emsav.

---

🔎 Ho kiriegezhioù

1. Melestradurezh & arc’hantaouiñ

Suraat a rit hentad melestradurel pep stajiad :

• Enskrivadurioù
• Sevel ha heuliañ an teuliadoù (arc’hantaouerien, rakprizioù, emglevioù ha kevratoù stummañ, testenioù)
• Heuliañ ar stajoù (ambroug ar stajidi, emglevioù, bilañsoù)

2. Aozañ ar stummadurioù ha heuliañ an deskerien

Kenurzhiañ a rit mont-en-dro ar c’hentelioù e darempred gant an urzhierien, an arc’hantaouerien hag an deskerien :

• Raktresañ hag aozañ ar stummadurioù hir, ar c’hentelioù sizhuniek, ar stajoù hag ar stummadurioù arbennik
• Titouriñ an deskerien a-hed ar c’hursus
• Heuliañ bezañs ar stajidi ha mirout oute da ziskregiñ
• Kenurzhiañ an implij-amzer gant ar skipailh hag ar stummerien ha prezegennerien eus an diavaez (deiziataer, kevratoù…)
• Degemer ar stajidi hag aozañ ur mont-en-dro plaen

3. Merañ ar savenn bedagogel

• Krouiñ ha merañ ar strolladoù ha kontoù an deskerien ha stummerien
• Hizivaat an deiziataerioù hag an teulioù embannet er savenn
• Reiñ ur skoazell deknikel gentañ

4. Reolennoù kalite

Labourat a rit da gas kalite ar stummadurioù war-raok dalc’hmat ha da ziwall ma vo lakaet e pleustr :

• Reolennoù an arc’hantaouiñ publik
• Reolennoù Qualiopi
• Frammañ an danevelloù-heuliañ hag an taolennoù heuliañ
• Prientiñ an aoditoù hag an amprouennoù kalite
• Hizivaat ar c’hatalog stummadurioù hag ar fichennoù programm

---

🧠 Doare den

✔ Barregezh teknikel

• Deuet mat e vo anaoudegezh eus gennad ar stummañ micherel hag eus ar savennoù niverel (CPF, Rannvro, France Travail, marc’hadoù publik…)
• Bezañ en h.e b.vleud gant Google Workspace hag an ostilhoù niverel da genlabourat
• Skiant-prenet war merañ diazoù roadennoù, LMS pe CRM a vefe talvoudus
• Barregezh solut war ar skridaozañ
• Brezhoneg ha galleg plaen (skridoù micherel)

✔ Barregezh aozañ

• Gallout merañ meur a stummadur gant reolennoù disheñvel war un dro
• Gallout heuliañ stummadurioù diouzh frammoù, palioù ha deiziataerioù lies
• Renkañ an taskoù diouzh ar priorelezhioù ha bezañ prim
• Bezañ gwevn a spered ha douget da labourat a-stroll

✔ Barregezh daremprediñ

• Douget da servij e seurt ma vo laouen an deskerien
• Pasiant, pizh ha fiziabl
• Gouzout mirout titouroù prevez
• Selaou
• Darempredoù aes

---

📍 Aozioù labour

• Kevrat didermen – Amzer leun
• Post diazezet e Roazhon (sez Skol an Emsav, 8 Contour Saint-Aubin, 35000 Roazhon)
• Mont war an hent d’al lec’hioù stummañ a-wezhioù
• Gopr : pazenn 13 – Emglev-stroll an aozadurioù stummañ (IDCC 1516)
• Stummet e vo ar skoazeller.ez-stummañ war ar post tamm-ha-tamm 

---

📩 Evit lakaat hoc’h anv

Trugarez da gas :

• CV
• Lizher emginnig

E galleg hag e brezhoneg, da :
📧 gwenael.dage@skolanemsav.bzh

📅 Deiziad diwezhañ : Sul 15 a viz Meurzh 2026
📅 Emgavioù : eus ar 17 betek an 20 a viz Meurzh 2026
📅 Kregiñ gant al labour : Meurzh 2026

---

Perak mont da labourat e Skol an Emsav ?

E Skol an Emsav e labouroc’h a-zevri da reiñ talvoudegezh d’ar brezhoneg ha da stummañ komzerien nevez, a-gevret gant ur skipailh aozet, pizh ha plijus, gant an deskerien e-kreiz hor preder.Emaoc’h o klask ur gefridi talvoudus, frammet, o liammañ brezhoneg, pedagogiezh ha melestradurezh ?
Lakait hoc’h anv hep gortoz pelloc’h !