An atalier advouezhiañ gant Tangi Daniel
Dispaket e oa bet studio Dizale en Arvor d’al Lun 13 a viz Meurzh da ginnig un abadenn advouezhiañ e brezhoneg digoust ha digor d’an holl.
Tangi Daniel, komedian, a oa war al lec’h da vuheziñ an abadenn, displegañ ar vicher ha respont d’ar goulennoù. Petra zo gwelloc’h eget pleustriñ gant ar c’homedian en deus roet e vouezh da dTerminator ?
Pep hini d’e dro pe daou-ha-daou e oa bet advouezhiet gant ar berzhidi un aktour pe un dudenn eus un dresadenn-vev. Tro-dro dek den o doa kemeret perzh, ul lod anezho kurius da c’houzout hiroc’h war mont-en-dro an advouezhiañ pe dedennet gant ar vicher.
Bannañ Valerian ha Laureline
War-lerc’h an atalier e oa bet skignet film Luc Besson, Valerian ha Laureline, embannet e 2017 hag advouezhiet e brezhoneg gant Dizale er bloaz-mañ.
Goude ur bloavezh o varc’hata gant ar broduerien – unan eus ar filmoù kerañ en istor ar sinema gall – eo deuet Dizale a-benn da brenañ ar gwirioù, da advouezhiañ ha skignañ anezhañ.
Evit ar wech kentañ e oa skignet ar film dirak ar publik, d’al Lun 13 a viz Meurzh 2023, e Roazhon hag e Gwened. N’eo ket echu an droiad war ar skrammoù bras evit Valerian ha Laureline, avat : abadennoù all a vo e Breizh.
War Radio Naoned
Morgan Cotten, kelaouennerez eus Radio Naoned, a oa war al lec’h evit atersiñ Samuel Julien, rener Dizale, hag ar vrezhonegerien o deus kemeret perzh en atalier. Gallout a rit selaou ouzh podcast Tarzh an Noz war lec’hienn Radio Naoned pe war-eeun amañ dindan.
Abadenn da zont : Marc’h al lorc’h, gant Claude Chabrol, d’al Lun 15 a viz Mae da 8e15 noz.
Goulennoù zo ?
Kas ur gemennadennC'hoant 'peus gouzout hiroc'h war hon obererezhioù kelenn ha dudi ? Laouen e vo hor skipailh da respont deoc'h !
