Mont pelloc’h ganti
Stummadur micherel evit mont war-raok gant ar brezhoneg. 3 mizvezh leun-amzer (35 eurvezh / sizhun). Live rekis : B1 (DBY)
Live rekis
B1 (DBY pe live da vezañ priziet e-pad an emgav gant penn ar stummadurioù a-raok kadarnaat an enskrivadur).
Publik ar stummadur
Digor ar stummadur barrekaat d’ar vrezhonegerien hag a faot dezhe mont war-raok gant ar brezhoneg ha puilhaat o anaoudegezh eus ar yezh. Da heul ar stummadur 6 miz e vez heuliet Mont pelloc’h ganti, hogen digor eo d’an holl gant ma vo boulc’het diwar al live rekis.
Framm : 420 eurvezh
- 420 eurvezh, 35 eurvezh / sizhun, d’al Lun betek ar Gwener
- 12 sizhunvezh kentelioù.
- Strolladoù 16-18 den, kement ha reiñ tu da bep hini da gemer perzh.
Palioù
- Tizhout live B2 an DBY (d’an nebeutañ).
- Deskiñ d’ar stajidi komz ha skrivañ flour, reizh hag aes, o-unan.
- Kreñvaat barregezhioù e-doare ma vint gouest da arguzenniñ diwar-benn a bep seurt sujedoù, teknikel pe dibaot, da-geñver eskemmoù a live uhel.
Hentennoù
- Studiañ ar yezh a-dostoc’h a vo graet dre hentennoù bev ha lies, dre skrid ha dre gomz – story telling, senario hollek, c’hoarioù eskemm… –, gant dafar pedagogel liesseurt (videoioù, levrioù, c’hoarioù, glad ha sevenadur Breizh…).
- 70 eurvezh gouestlet da seveniñ raktresoù pleustrek, diouzh ezhomm hag interest pep hini.
- Prantadoù gouestlet da varregezhioù ha micherioù resis : skrivañ, treiñ, embann, atalieroù kleweled, labour war an distagadur, bezañ en e aez dre gomz e-serr c’hoari, c’hoariva.
- Prantadoù istor ar yezh hag ar rannyezhoù.
Priziañ
• Bilañsoù bep sizhun ha div wezh ar miz
Amprouadennoù dre skrid ha dre gomz a vez kinniget bep sizhun evit heuliañ live ar stajidi. Bilañsoù hollek a vez graet bep 6 pe 8 sizhun ivez. E-barzh levrig ar stajiad e vez renablet ar barregezhioù tapet a-benn reiñ da bep hini da welet disoc’h e strivoù.
• DBY Brezhoneg, un diplom-Stad
Ret eo d’ar stajidi tremen arnodenn an DBY (Diplom Barregezhioù war ar Yezh) a-benn fin ar stummadur. Diwar an arnodenn-se e vez roet da bep stajiad ul live diouzh skeul voutin Europa (Cadre européen commun de référence pour les Langues). Un diplom-Stad eo an DBY. Evit lakaat ar stajidi da bleustriñ war an arnodenn (framm, danvez…) e vez aozet un DBY gwenn e-kerzh ar stummadur.
Mont pelloc’h er Skol-Veur
Roet e vez an tu d’ar stajidi da genderc’hel gant o studi en Aotregezh 3 pe er Master 1 war ar brezhoneg e Skol-Veur Roazhon 2 ha/pe da lakaat o anv evit DEC/DSEC/DU a-benn fin ar stummadur.
Prantadoù da zont
13/09/2023 > 14/12/2023
Prizioù
Hentad enrollañ
Dre ar furmskrid amañ dindan, dre bostel, dre bellgomz pe war al lec’h e c’hellit mont e darempred ganeomp m’ho peus goulennoù diwar-benn ar stummadur (arc’hantaouiñ, melestradur, pedagogiezh…).
Ma fell deoc’h lakaat hoc’h anv e vo goulennet diganeoc’h ul lizher emginnig hag ur CV.
Emgav a vo roet deoc’h gant penn ar stummadurioù goude bezañ resevet ho lizher hag ho CV.
War al lec’h pe a-bell (dre bellgomz / enlinenn) e vo dalc’het ar pennad-kaoz e-pad un eur pe war-dro.
Displeget e vo deoc’h pal ar stummadur, ar raktresoù zo stag outañ, an doare da gelenn hag ar program pedagogel.
Un digarez e vo ivez da welet daoust ha spletus e vo ar stummadur deoc’h, diouzh ho raktres, ha da briziañ ho live brezhoneg a-raok kregiñ ganti.
Pemzektez war-lerc’h an emgav e vo kaset hor respont deoc’h, d’an diwezhatañ, gant un testeni enskrivañ mar bez ezhomm.
Evit kadarnaat hoc’h enskrivadur e vo goulennet meur desteni diganeoc’h.
Evit an holl :
- Teuliad enskrivañ leuniet
- Testeni ar Surentez Sokial
- Un eilenn eus ho kartenn identelezh pe ho paseporzh
- 80 € arrezioù diwar ar mizoù enskrivañ (e-touez 290 €)
Diouzh ho tegouezh :
- Testeni Pol Implij
- Kopi ho testeni ehan-stummañ asantet
Hoc’h ambroug a raimp evit arc’hantaouiñ ho stummadur
- Tud dilabour
- Ehan-stummañ
- Tud e-maez a garg
- …
3 mizvezh emaomp o vont da gas asambles. Tro ho po da gejañ gant ho keneiled staj da-geñver un emvod rak-distro-skol. Ar program hag ar stummerien a vo kinniget deoc’h.
Lec'hioù
Naoned - Sant-Ervlan
12 bali an Angevinière
44800 Sant-Ervlan
Roazhon - Skol an Emsav
35000 ROAZHON
(Metro Saintez-Anna a/b)
Prest oc'h da gregiñ e-barzh ?
Testenioù
Ninóg
Stajiadez e Roazhon e 2021-2022 - 9 miz
« A-hed ur stummadur 6 ha 3 miz em eus tapet trawalc'h a c'houiziegezh ha fiziañs ennon evit kompren, komz ha skrivañ e brezhoneg a-drugarez da zoareoù stummañ ken liesseurt hag efedus kinniget gant Skol An Emsav. E fin an 9 miz em eus gallet treiñ kanaouennoù din zoken. Goude ar stummadur-se on bet degemeret war-eeun e trede bloaz an aotreegezh vrezhonek e skol-veur Roazhon 2. Laouen on o vezañ prest da sevel kanaouennoù nevez e brezhoneg bremañ... Lec'hienn internet Ninóg Pajenn Facebook Ninóg »
Vassili
Stajiad e Naoned (Sant-Ervlain) e 2021-2022 - 9 miz
« A-drugarez d'ur bedagogiezh efedus, desket hon eus brezhoneg ha gouest omp da greñvat hol live. N'am eus keuz ebet o vezañ heuliet ar stummadur : Kavet em eus ma labour divyezhek kentañ ha mont a ran war-raok gant ma raktresoù hiniennel e brezhoneg. »
Foar ar goulennoù
Ar c’hopridi a c’hell lakaat o gwir hiniennel d’en em stummañ da dalvezout ha goulenn d’ur c’hoñje-stummañ digant o implijer, evit mont war-raok gant o labour pe evit cheñch micher. Aozet e vo an teuliad a-gevret gant OPCO ho kennad-labour.
Pep hini a c’hell tennañ splet eus e gont stummañ personel ivez. Gouzout hiroc’h diwar-benn ar CPF : moncompteformation.gouv.fr/
An dud dilabour enrollet e Pol Implij a vez arc’hantaouet o stummadur dezhe (mizoù pedagogiezh hepken gant Kuzul Rannvro Breizh.
Ar re ne vezont ket digollet gant Pol Implij (ARE) a c’hell goulenn ur yalc’had-skoazell ouzhpenn d’o sikour da vevañ e-pad ar c’houlzad stummañ.
Evit gouzout hiroc’h: bretagne.bzh
- Fellout a ra deoc’h dont da vezañ kelenner divyezhek pe tremen ar genskrivadeg,
- Fellout a ra deoc’h heuliañ ar stummadur gant ar statud kelenner e-maez a garg pe gant un ehan-stummañ,
Ar mizoù pedagogiezh hag enskrivañ a chomo war ho chouk. Kinnig a ra Kuzul Rannvro Breizh skoazellañ ac’hanoc’h, avat. Trawalc’h e vo deoc’h goulenn ar yalc’had DESK.
Evit gouzout hiroc’h : bretagne.bzh
Danvez-kelennerien zo a c’hell bezañ sammet o mizoù pedagogiezh gant Kuzul Rannvro Breizh, avat, diouzh an degouezh. Deuit e darempred ganeomp evit gouzout hiroc’h.
Gallout a rit goulenn bezañ lakaet e-maez a garg evit heuliañ ar stummadur.
Ar mizoù pedagogiezh hag enskrivañ a chomo war ho chouk, avat.
Stajidi zo er rummad-se a c’hell bezañ sammet o mizoù pedagogiezh gant Kuzul Rannvro Breizh, avat, diouzh an degouezh. Deuit e darempred ganeomp evit gouzout hiroc’h.
Stummadurioù all
Goulennoù zo ?
Kas ur gemennadennC'hoant 'peus gouzout hiroc'h war hon obererezhioù kelenn ha dudi ? Laouen e vo hor skipailh da respont deoc'h !
